2Cor 11 | APZ | STEP | Sekwo ngkimo nupo'ntohumamno. I ngko hungkuno fehohnjo a'amu omomo hungkuno lɨwo'nɨngkohofo sohwafe hungkuno hopa ko selɨ'me'no sekwo nje hungkuno somo nupo'ntohumamno.

2 Corinthians 11

A'amu fehohnjoso ole lɨmotofo, Anɨtu kakoe hungkuno lɨku'mofo syoho so'no nahwosopo'mentiso hwona'nyoho. Oso hungkuno hwasyo lɨmotofo sohwamne'no Poul kako hofɨkoe yahino somne'no ujo ehontojwahumentisofoho.

1 Sekwo ngkimo nupo'ntohumamno. I ngko hungkuno fehohnjo a'amu omomo hungkuno lɨwo'nɨngkohofo sohwafe hungkuno hopa ko selɨ'me'no sekwo nje hungkuno somo nupo'ntohumamno. 2 Upa'nyo Anɨtu kako sekumo kakimnohini inɨngkayo'ne sehwosopo'mentisofoho. Oso'no nom'ne a'amuso sekumo hwasyo honɨngkanomo ipesemotafijo so'no Anɨtuye sɨmeho wonyo umo'nɨmontonoho. I oso'no ngko huhwo'ni sɨmeho wonyo wanɨmo'nɨmontonoho. Ihwoni. Ngko pahnnɨmo hungkuno we'enehwo waselɨmonne'no yohono. Sekwo a'mu sijo sofa nom'ni hwamne'no huno mosyafɨso hwehwamne'nohini huno syafɨsyɨwo'nɨngkohofo hopaso ngko sekumo Kɨlaisɨyepono sehwatɨ'me'no sekwo kakimnohini huno fisyafɨhupmno. Sekwo nom'nihumo unɨngkowano lɨfijoso Anɨtu kako sɨmeho wonyo wosejapmmontonoho. I ngko huhwo'ni sɨmeho wonyo wosejapmmonnoho. 3 I oso'no ngko olo hilo so'no iyoho nnɨngkohoho. Hohonta Seten kako homa imo'nonto Atam kakoe ape Efamo hwasyo ulɨmentiso so'no Efa kako hwasyo honɨngkanomo inɨngkamentisofoho. Seten ose uloho'mentiso hopaso a'amu fehohnjo hofɨko hwasyo hungkuno lohose'mafɨkujo'no sekwo Anɨtuye honɨngkanomo hofiyo inɨngkawowo'nɨngkohofo somo nusɨkwojɨkuji hwasyo honɨngkanomo inɨngkayo so'no ngko iyoho nnɨngkohoho. Sekwo Kɨlaisɨmnohini inɨngkayo yahinoso nusɨkwajɨfitnnohontnne'no selalokweno. 4 Hwapɨngoso a'amu fehohnjo hofɨko sekumo se'mantɨfi Jisasɨmne'no ngko hungkuno selɨmentoheso molohose'ma'mmalofo. O'o, Jisasɨmne'no hofɨko sekumo wase'mano ko lontɨfi hofɨkoe hwasyo hungkunoso Jisasɨmne'no lohose'ma'malofofoho. Oso hwasyo hungkuno homo somne'nohini syafɨsyɨwo'nɨngkohofofoho. Hohonta nakwo Jisas Kɨlaisɨye hungkuno wopɨngo selɨmentɨhwone sohonta sekwo Anɨtuye Towahuno wopɨngo ma'mentohofofoho. I olohonta sekwo hofɨkoe hwasyo hungkuno somne'no ne'njofoho lontɨfi sekwo towahuno nom'ne kengo ma'malofo kuyoho. A'amu sekumo hwasyo selontanɨngkofi sekwo nakwolaho mujo kuyoho. O'o, sekwo oso syoho hiso ifijo hopaso nomapitnnefoho.

5 Sekwo upa'nɨmno. Oso a'amu (apousel) huhwo sohwamo sekwo wonyoangkafo hwasoho ulɨwo'nɨngkohofoso hofɨko nje yofemo niyakolo'nnyo hwolaho. Nɨhu'no awonoho. 6 A'amu fehohnjo hungkuno lutɨhwayo yahino wonyoangkafo iwo'nɨngkohofo hopaso ngko ko miyo'njo imneso ngko Anɨtuye hungkuno somne'no nje hunoso umofonyo miyohoyohono. O'o, Anɨtuye hungkuno neso ngko huno niyohoho. Oso hiso'no sekwo huno seyohoho. Sɨkuno pi'nɨngo engo somo nakwo sekumo Anɨtuye yahino ne so'no nto esetɨhwamentɨhwonefoho.

7 Sekwo huno seyohoho. Ngko sekwo'nji nohumanji Anɨtuye hungkuno losetɨhwamentohe sohonta ngko oso syoho homo somne'no hamniyoho'no jomo selɨmentohetaho. O'o, ngko nje yofe monje yahinɨmentohe so'no ngko nje nonyo wosopayo yo'mayo so'no syoho imentohefoho. Oso'no ngko sekwoe yofe honje ho'nosemanji sekumo nje syoho ntohofiyo kuyoho'nji momasemoku'mmentohefoho. Oso yahino wopɨngo sekumo seloho'mentoheso wonyotaho. 8 Ngko sekwo'nji nohumentanɨngko Anɨtuye a'amu ango kengo mta'angoso ngkine'no nje wosopayo yo'mayo somne'no hamniyoho uyohotɨmentohofofoho. Oseso ngko sekumo sefo'mayo'ne a'amu kengo somta'ni hamniyoho hufo hopa ma'mentohefoho. 9 Hohonta ngko sekwo'nji humamote sohonta ngko yo'mayo so'no umofonyo yonji oso hiso'no sekumo jomo maseli yonji sekumo tango mosejapefoho. O'o, Anɨtuye a'amu Masetouniya humamotofoso ango Koulin sopo i'mofopahonɨngkofi ngko yo'mayo umofonyo imoteso hopoenohini ntapmmentohofofoho. Oseso ngko hohonta sekwo'nji humanji nje yo'mayo so'no tango mosejapmmotefoho. Oso'no olohontajo so'nji oso yahino hiso'nji ne'no wamjɨmɨ'momnefoho. 10 Kɨlaisɨye hungkuno neso ngkimo nɨweho. Oseso nje yahino hiso'ne'no ngko nje yofe ho'nomanɨ'me'no a'amu Ngkɨlik sofe ango'meemo ho'nɨngkanɨngkuhwosi hofɨko oso homo somne'no nje yofe monje meenɨhufitnnehofo. 11 Oso hungkuno hiso ngko peho'no selohono. Ngko sekumo sɨmeho mosejapmmale'no laselohono. O'o, oso'ne'maho. Ngko sekumo sɨmeho sejapɨwo'nɨngkohe so'no Anɨtu kako huno moi'wonoho. 12 O'o, oso hiso olenoho. Oso a'amu huhwo sohwa hofɨko Anɨtuye hungkuno hwasyo losetɨhwawo'nɨngkohofo sohwa hofɨkoe yofe ho'noma'nyo'ne nakwo Anɨtuye syohoso Poul hopa iwo'nɨngkuhwone hwona'nyoho. Ose ko lontɨfi hofɨko sekumta'ni yo'mayoso semalokwofo. Oso'no hofɨkoe honɨngkano somo pɨjwohumayo'ne ngko sekumta'ni nje syoho somne'no yo'mayo so'no jomo molosema'mmote yahino hiso olohonta ho'nomo'nalokweno.

13 Oso a'amu (apousel) homo somo Anɨtu kakoe syoho somne'no muhwosopo'mmentisofoho. O'o, hofɨko hwasyo hungkuno ole selɨwo'nɨngkofi, Nakwo a'amuapousel sohwafe syoho'njo hwona'nyoho. Ose selahonɨngkofi sekwo oso homo somo inɨngkawo'nɨngkohofofoho. 14 Sekwo oso hiso'no hi semo'nɨngkuhwoloho. Seten kako huhwo'nji honɨngkano hwasyo somo sekumo ipesemotayo'ne a'amu ahwomo mta'angohwa pa'nɨngo pomponaho engo'nji imokinɨwo'nɨngkiso hweho. 15 Oseso a'amu Setenɨye syoho ulohofiyoso hofɨko Anɨtuye syoho ulohofiyo hopa imo'nyo so'no sekwo yomo ikutoho. Sekwo oso a'amu huhwo sohwamo nuhwonontɨfi a'amu wopɨngofoho senɨwo'nɨngkiso kuyoho. I oso'no hwangku no'mo hofɨkoe yahino yontɨfijo somne'no tohino engo mapitnnefoho.

Poul kako Anɨtuye hungkuno lɨku'mofo syoho somne'no tango engo ma'mentisofoho.

16 Sɨmo'mo ngko ole selohono, Ngko a'amu omomo hungkuno lɨwo'nɨngkohofo sohwafe hungkuno hopa ko selɨ'me'no sekwo nje hungkuno somo nupo'ntohumamno. Olo hungkuno selalokwe loso omomo hungkuno nelalofoho syafɨsyɨkujɨ'manji e'wano omomo hungkuno we'enehwo selɨ'me'no upo'ntohumamno. Oso a'amu huhwo sohwa hofɨko Anɨtuye hungkuno hwasyo losetɨhwantɨfi hofɨkoe yofe ho'noma'nɨwo'nɨngkohofo hopaso ngko nje yofe woho'noma'nɨmonne'no yohono. 17 Hungkuno selalokwe loso Anɨtuye'maho. O'o, a'amu omomo hungkuno selɨwo'nɨngkohofo sohwa hofɨkoe yofe ho'noma'nyo'ne omomo hungkuno selɨwo'nɨngkohofo hopa selalokweno. 18 I a'amu pi'nɨngo hwahoponjo yahinomo inɨngkawentɨfi hofɨkoe yofe ho'noma'nɨwo'nɨngkohofo sohwafe yahinomo we'enehwo inɨngka'mo nje yofe woho'noma'nɨmonne'no selalokweno. 19 Sekwo a'amu huno'njɨ'nwoho lolalokwofo. I sekwo a'amu hwasyo hungkuno selɨwo'nɨngkohofo sohwamo tɨfi inɨngkawo'nɨngkohofo so'no huno ane kuyoho. 20 A'amu fihwo kako nje syoho wontohofiyano selɨhwosi mimpo'nosemotahwosi sekwo inɨngkayo'nohino kuyoho. U kako sekwoe yo'mayoso moi'wo wolasemo'mo syafɨsyɨhwosi hwasyo hungkuno wolosetɨma'montonoho. Kako poji esetɨmanto imayo selohofɨwo'nɨngkiso hweho. Kako sekumo monje yasesyonto sekwoe sɨmo'mangopo ajonyo sefonjahonɨngki sekwo kakimo tɨmo'nohini uhwontohumawo'nɨngkohofo kuyoho. Yoka mujo'njo kuyoho. 21 Ngko oso yahino hiso imneso yokumpohn'nyo ane hwo'nyoho. Oso'no ngko oso hopa sekumo moseloho'meso'no ngko wonɨmango wannɨmontonoho.

I nom'ne omomo hungkuno apa'no waselɨmonne'no yohono. A'amu nom'ne sohwa hofɨkoe yofe yo'mayo so'no ho'noma'nɨwo'nɨngkohofo hopaso ngko huhwo'ni nje yofe woho'noma'nɨmonne'no yohono. Nje omomo hungkuno upa'nɨmno. 22 Hofɨkoe yofe ho'noma'nyo'neso ole lahnnɨwo'nɨngkohofo. Nakwo a'amu Hipɨlu hwona'nyoho. Ose lahnnɨwo'nɨngkohofo. I ngko huhwo'ni Hipɨlu a'amu hwo'nyoho.

U ole lahnnɨwo'nɨngkohofo, Nakwo a'amu Isɨlael hwona'nyoho. I ngko huhwo'nyi a'amu Isɨlael hwo'nyoho. U, Apɨlohamɨye imuhwolaho. Ngko huhwo'ni Apɨlohamɨye imu hwo'nyoho.

23 U hofɨko Anɨtuye syoho ulohofiyo hwolaho. I nje yofe ho'noma'nyo somne'no omomo hungkuno apa'no wahnnɨmo. Hofɨko Kɨlaisɨmne'no syoho iwo'nɨngkohofo somo ngko hofɨkimo uyakolofohono. Nje syoho engoso hofɨkimo uyakolokwoho. Ngko impo'angomo humayoso sɨkuno pi'nɨngo niyakolofoso ngko hofɨkimo uyakolofohono. Anɨtuye syoho somne'no a'amu ngkimo ikujoho nɨfonjontɨfeso ngko hofɨkimo uyakolofohono. Sɨkuno pi'nɨngo ngko poyo wape'nɨmonji iyoso hofɨkimo uyakolofohono. 24 A'amu Juta sohwa hofɨko ngkimo impojonyo sɨkuno kengo kengo aho fehohnjo hopi'nonohino somo ne'no nɨfonjontanɨngkofiteti-nain (39) imo'nɨmentisofoho. 25 Sɨkuno hufa'u sɨhune somo a'amu Loum sohwa hofɨko sohwe sonyo ikujoho'nji nɨfongku'mentohofofoho. Sɨkuno fihwi hofɨko ngkimo sojo'nji nɨposɨ'mentohofofoho. Sɨkuno fihwi ngko yofayokinopo nohumentanɨngko yofayokino hiso wonyo imo'nɨmentisofoho. Oso hiso sɨkuno anga'nohinomo emoimentohe'maho. O'o, sɨkuno hufa'u sɨhune emoyonji wonyo imo'nɨmentisofoho. I sɨkuno nom'nemo yofayokino mijo ajwopo wonyo imo'nɨmentiso sohonta ngko sɨkuno anga'no mofehi'nyo anga'no mijo ajwopo mtapmmentohefoho. 26 Sɨkuno pi'nɨngo engo ngko Anɨtuye syoho somne'no a'amumo lɨku'mofontanɨngko mijo ifofayo yonto ngkimo wonyo wanɨmokumonto imentisofoho. A'amu wonyo honɨngkano'njo sohwa hofɨko a'amufe ho'yango hufo imotofo sohwa hofɨko ngkimo honɨngkanopo wonyo wonɨmokantɨfi imentohofofoho. Nje a'amu Juta huhwanji a'amu temtitofo kengo huhwanji ngkimo wonyo wonɨmokantɨfi imentohofofoho. Ngko antɨme engo sopo we so'mo mijo ayo ajwopo nohumentanɨngko yo'mayo yahinoso ngkimo wonyo wanɨmokumonto imentisofoho. A'amu fehohnjo hofɨko nakwo Jisasɨye syoho'njo hwona'nyoho hwasyo lontɨfi hofɨko huhwanji ngkimo wonyo wonɨmokantɨfi imentohofofoho. 27 Ngko sɨkuno pi'nɨngo engo somo yo'mayo yo'mayo syoho yokumpohn'nyo tohohmtnno'njo iwo'nɨngkohe hwo'nyoho. Ngko ose yontnne sohwo'ni sɨkuno pi'nɨngo somo ngko saho mofosyawosofoho. Oso syoho hiso ne'no yonji ngko wopayo'nji mijo'ntnne'no mijoho pe'nɨmotefoho. Sɨkuno pi'nɨngo ngko wosopayo manyo'njo yonji yo'mayo hwapɨfe so'ntnne'no umofonyo yonji kwongkwongo nisɨmojofoho.

28 Oso tango hiso'nohinɨ'maho. O'o, sɨkuno huhwo huhwi tango nom'ne olo so'nji nɨ'mawo'nɨngkisofoho. A'amu Anɨtumne'no uhu'mokuwo'nɨngkohofo sofe tango so'ntnne'no ngko huno syafɨsyonji ngko hofɨkimo wopɨngo'nohini ufo'mahm'mo hofiyo umokosyohumayo so'ne'nohini syafɨsyɨwo'nɨngkohefoho. 29 Oso a'amu hiso honɨngkano wonyo ifijo'manji ngko huhwonnontnne'no sɨmeho tango niyantofoho. U nom'ne a'amuso oso a'amu homo somo honɨngkano wonyo somo ipemotawofijo'manji ngko oso a'amu ipemotafijo somne'no sɨmeho tohino wannɨmontonoho.

30 A'amu omomo hungkuno lɨwo'nɨngkohofo sohwa hofɨkoe yofe ho'noma'nɨwo'nɨngkohofo hopaso ngko uyɨmo hnnɨme'manji ole wahnnɨmo. Ngko yokumpohn'nyo ane hwo'nyoho. Ose hnnɨme somne'no ngko nje yofe woho'noma'nɨmonne'no yohono. 31 Anɨtu sohwo kako nakwoe Hwe Engo Jisas Kɨlaisɨye kanɨngkwohwo ko imo'nonto kakoe Hwe Engo hweho. Oso huhwo sohwoe yofeso ne'no woho'nomehwantanoho. Oso huhwo sohwo kako nje hungkuno nehopi'nohino lalokwe somne'no huno uyohoho. 32 Ngko ango Ntomasɨkos sopo nohumentanɨngko hwe engo hwaho mokosyohumayo Aletas sohwoe hwe mnokino manji'mofo'njo a'amumo mokosyohumayo sohwo kako Poulɨmo aho wakeno lonto kako a'amu syuwo'nɨngkohofo kuso somo ngko Poulɨ'nɨmo aho nɨke'ne a'amu sohwamo uhumatɨ'mentisofoho. 33 Ose ko uhumojahonɨngki Jisasɨye a'amu fehohnjo sohwa ngkimo sohwo ho'yo engo somo meenɨsyontɨfi nom'ne sofo we'e so'mo sohwo ho'yo somo impe intofontɨfi intofaniyoho'mokahonɨngkofi ngko hwaho mompo sohwo ho'yo somta'ni nɨhu'nahone hiyaso joku'nɨngkale'mo'mentohefoho.